سنسیز داریخیر روح و روانیم منی دیندیر
عشقیندی منیم جسمیده جانیم منی دیندیر
سنسیز منه بیر ثانیه بیر ایلدی عزیزیم
هجران الووی کسدی امانیم منی دیندیر
گؤزلر گئجه‌لر صوبحه ‌جه جیران سنی گؤزلر
قویما قارا گؤز صوبحه جه یانیم منی دیندیر
یاندیردی منی نازیله پروانه خدایا
شمع تک یئری وار قانه بویانیم منی دیندیر
هجران اودونا ییغما اودون قوی داها سؤنسون
رحم ائیله قوتار آه و فغانیم منی دیندیر
من بیر بالیغام دوشموشم آیری دنیزیمدن
روحوم چابالیر یوخدو توانیم منی دیندیر
لیلا مثلی سن ده منی چؤللره سالدین
مجنون کیمی داغلاردی مکانیم منی دیندیر
خسرو یئنه شیرینی سالیب آیری یاریندان
ظولمیله آخر تیشه ده قانیم منی دیندیر
آچدین ساچیوی اوخلاری ساچدین سینم اوسته
دین گئتدی تالان اولدو ایمانیم منی دیندیر
فرهاد دؤزه بیلمیر غم هجرانیوه شیرین
قوی باشیوه یوز دفعه دولانیم منی دیندیر