وای منيم حاليمه معشوقه اگر آتسا منى
باشقا بير ياره وورولسا ، هدره ساتسا منى
آيریلیق سازينى چالسا، کدره قاتسا منی
بیلمیرم آيریلیقیندا ،نئجه اونسوز دؤزه رم؟
اولارام بير دلی ،ويرانه لرى من گزه رم
وای منيم حاليمه گؤرسم ، ألی أللرده قالیب
بير وفاسیز اؤتوروب،ياريمى چوخ درده سالیب
او سبب دن ياریمین، گؤزلرى يوللاردا قالیب
او وفاسیز باشینى، من بدنيندن اوزه رم
اولارام بير دلی، ويرانه لرى من گزه رم
وای منيم حاليمه عشقيم، منه يومسا گؤزونى
اؤزگه لرله اوتوروب ،سؤيله سه يار اؤز سؤزونى
ترک ائديب گئتسه، اوزاخلاتسا منه اؤز اؤزونى
آغلايیب گؤز اؤنونه ،عکسيلرين من دوزه رم
اولارام بير دلی ،ويرانه لرى من گزه رم
وای منيم حاليمه ،آسوده خيال اولسام اگر
بير گونی گؤرسم اگر ،نازيوى بير اؤزگه چکر
بيل او گون يوخدى، حياتیندا سهندين  دن اثر
سؤکرم قلبيمى سنسيز ،بو حياتدان کؤچه رم
اولارام بير دلی ،ويرانه لرى من گزه رم